Piztu itxaropena, Sahararen aldeko 12garren euskal karabana martxan dago. Gaur hasiko da Hernanin, janaria biltzeko kanpaina. Honako produktuak bilduko dituzte, Tindoufen bizi diren Saharako errefuxiatuei emateko: arroza, olioa, pasta, lekaleak, azukrea, konpresak, atuna eta sardinak oliotan.
Gaurtik, ikastoletan eta Biterin
Herriko ikastetxeetan eta Biteri kultur etxean izango da janaria uzteko aukera, gaurtik. Ikastetxeetako kanpaina 18ra arte luzatuko da eta Biterikoa, otsailaren 6ra arte.
Supermerkatuetan ere jarriko dituzte janaria biltzeko guneak. Abenduaren 18an eta 19an izango da hori. Otsailean ere izango dira beste bi egun.
Ekintza gehiago
Beste ekintza batzuk ere antolatzen ari direla adierazi dute Udaleko Kooperazio Taldeko kideek eta Sahararen aldeko lagunek: informazio kanpaina, besteak beste.
Bilera, bihar
Hurrengo bilera bihar egingo dute. Arratsaldeko 18:00etan izango da, Biterin.
Atzerapenei erantzuteko
Karabana hau, Saharako Ilargi-erdi Gorriaren eta Saharar Emakumeen Nazio Batasunaren deiari erantzunez antolatu da. Adierazi dutenez, «1975etik, nazioarteko zenbait erakunde arduratzen dira errefuxiatuei janaria emateaz, baina arrazoi desberdinak tarteko, janari horiek ez dira beti kanpamenduetara nahi adina ez nahi bezalako erregulartasunez heltzen. Ondorioz, atzerapen haundiak eta eskasia egoerak ematen dira. Elikadura aldetik segurtasunik ez izateak ondorio latzak dakartza herritarren bizi-kalitatean. Desnutrizioak eragindako patologiak nagusitzen dira eta beste gaixotasun batzuei aurre egiteko gaitasuna murrizten da».
Guztia garraiatzeko, bigarren eskuko kamioiak ere erosiko dituzte. Diruz laguntzeko: 3035 0080 94 0800054177 (Laborala).