Prentsa Ohar bidez «harridura» azaldu du EH Bilduk, prentsan irakurri duelako Udal Gobernuak txostena eskatu duela DBHko lurren gaia nola dagoen jakiteko. «Azala behar da, gero! EAJren Udal Gobernuak ez dio inolako txostenik eskatu, ez Idazkariari, ez Udal Arkitektoari, ezta aholkulari juridikoari ere. EH Bildu izan da eskaera luzatu duena».
Hori horrela, «esandakoa publikoki zuzen dezatela» eskatu du. «Azaroaren 26an egin genuen eskaera erregistroz, EAJren pasibitatea antzemanda. Berria argitara eman zen egun berean egin zuen EAJk eskaera».
«DBHko instituturako lurra berehala okupa daiteke»
Bestalde, EH Bilduk alkate-ordearen «ezjakintasuna» salatu du, Plan Orokorraren aldaketan zehaztutakoa gogoraraziz.
«Estrategikoa dela sinesten badugu, beharrezkoa da lan-bilerak atzeratzen ez hastea»
«Plenoan azaldu bezala, momentuan bertan inolako ordainketarik egin gabe Udalak DBHko instituturako lurra berehala okupa dezake. Berez, DBHrako aurreikusia dagoen espazioa beste eremu urbanistiko zabalago batean dago kokatua, eta eremu hori urbanistikoki garatzen bada, lur jabeek, lur horiek doan eman behar dizkiote Udalari. Garatzen ez bada, ordea, Udalak 4 urte ditu jabeekin negoziatu eta dogokiena ordaintzeko. Hauxe da Zorioneri parte hartu zuen batzordeetan eta Plenoetan behin eta berriz azaldu geniona eta berak bere botoarekin onartu zuena».
«Zailena egiteke dago: Hezkuntza Sailaren konpromisoa lortzea»
EH Bilduk dio oraindik lan asko dagoela egiteko. Zentzu horretan, Udalari «mahaia osatzearen erabakia berraztertu dezala eta lan-bilera berehala deitu dezala» eskatu dio. Izan ere, «Guraso Elkarteak DBHren gaia jorratzeko proposatutako herritar, eragile eta politikoak bilduko dituen lan-mahaia eratzea ez du onartu». Era berean, «Udal Gobernuak Guraso Elkartearekin lan-bilera atzeratu nahi du txostena eskuartean izan arte». Horren harira, EH Bilduk azaldu du: «DBHrako zailena egiteke dago: Hezkuntza Sailaren konpromisoa lortzea. Estrategikoa dela sinesten badugu, behar beharrezkoa da lan-bilera hauek atzeratzen ez hastea». Horren harira, EH Bilduk «prestutasun osoa» azaldu du institutuaren alde lan egiteko.