Paul Ojuelek Huarteko lau t’erdiko txapelketako finala jokatuko du gaur. Txapelketa hau, afizionatu mailako txapelketarik entzutetsuenetako bat da. Huarten bertan izango da, 11:30etatik aurrera (bigarrena).
Aurkaria, Eneko Yoldi izango du hernaniarrak, afizionatuetako aurrelaririk onenetakoa eta txapelketa hau hainbatetan irabazitakoa. Arerio zaila izango du, beraz, eta ez da faborito izango, baina irabazteko gaitasunik ez du falta Ojuelek. Kalitate haundiko pelotaria da eta gainera, moralez gainezka iritsi da finalera, aurrez lau alditan ateetan geratu izan baita.
Finalera iristeko, hiru pelotari nafarrei irabazi die Ojuelek: final zortzirenetan, 22-3 irabazi zion Otxandorenari; final laurdenetan, 22-11 Iriarteri; eta finalerdietan, 22-21 Garraldari.
Euskal Herrikoan, 3-0 galdu
Euskal Herriko elkartearteko txapelketa aurrera doa eta Hernanik 3-0 galdu zuen Zaramagaren kontra, ostiralean. Kanporaketako buelta igandean jokatuko da Hernanin, 11:00etatik aurrera. Zaila izango da markagailuari buelta ematea, baina pelotari titular guztiak osatuz gero, aukerak ikusten dituzte Rufino Rekalde arduradunak. Eskuz banaka, lau t’erdian, Ioritz Arrietak 18-8 galdu zuen Larrañagaren kontra. Hernaniarrak ez zuen egun ona izan. Eskuz banaka, frontoi osoan, Oier Apezetxeak 18-17 galdu zuen Albaradoren kontra. Goizuetarrak partidu bikaina jokatu zuen, baina azkenean GRAVNIko egungo txapelduna nagusitu zen. Eta eskuz binaka, Ekaitz Cisneros eta Aritz Murgiondok 22-8 galdu zuten Mikel Rafael eta Agirreren kontra. Bikote hernaniarrak dena eman zuen, baina ez zen nahikoa izan.
Oiartzabal final laurdenetan, errendimenduko txapelketan
Gipuzkoako errendimenduko txapelketa jokatzen ari dira pelotari hernaniarrak. Asteburuko emaitzak tarteko, alebinetan, Etxarri, Arluziaga eta Jarak kontsolazio faseko final laurdenak jokatuko dituzte.
Infantiletan, berriz, Oiartzabalek azken faseko final laurdenak jokatuko ditu. Eta Insausti II eta Martinek, kontsolazio faseko final laurdenak jokatuko dituzte.