Hernaniko Bertso Eskolako kideak fin ibili dira Gipuzkoako Bertsolari Txapelketako finalaurrekoetan ere, eta finalerako pasea lortu dute hiruk: Unai Agirre hernaniarrak, Beñat Gaztelumendi añorgarrak eta Agin Laburu astigartarrak. Unai Gaztelumendik, berriz, ez du aurrera egitea lortu.
Igandean jokatu zen azken finalaurrekoa Eibarren eta hantxe erabaki ziren finalistak. Jon Maiak irabazi zuen, zuzeneko pasea lortuz.
Agirrek punturik gehien
Maiak egin bezala, zuzeneko pasea lortu dutenak Unai Agirre eta Alaia Martin izan dira; gainerakoak azken saioaren zain zeuden.
Hiru saio izan dira finalaurrekoetan, eta denak kontuan hartuta, Unai Agirrek lortu ditu puntu gehien (517 p). Atzetik geratu dira: Alaia Martin (504 p), Beñat Gaztelumendi (501 p), Jon Maia (500.5 p), Agin Laburu (496 p), Iñaki Apalategi (493.5 p), Oihana Iguaran (482 p) eta Arkaitz Oiartzabal Xamoa (481 p). Azken biek, aurreneko aldiz hartuko dute parte finalean.
Finala, Ilunben
Abenduaren 19an jokatuko da finala Donostiako Ilunben. Arratsaldeko 17:00etan hasiko da saioa. Sarrerak salgai daude Hernanin, Tripontzi tabernan, eta baita www.bertsosarrerak.eus webgunean ere.