Estuak izan ziren joaneko lehiak, Binakako Txapelketaren bi semifinaletan, eta estuak espero dira bueltakoak ere, datorren larunbatean.
Aurreneko semifinalean, Urriza eta Agirrezabala nagusitu ziren (40-37), Ezkurra eta Endikaren kontra. Atzetik hasi ziren markagailuan, eta 22-27 ere egon ziren galtzen, baina buelta ematea lortu zuten. Edozein kasutan, 38 tanto egin beharra daukate bueltako partiduan, finalerako txartela lortzeko. Oso irekia dago kanporaketa, beraz.
Bi tantoren aldea, bigarren semifinalean
Eta aurrenekoa irekia badago, zer esanik ez bigarrena. Bi tantoren aldearekin irabazi zuten Matxin III eta Ionek, Etxeberria IV eta Etxeberria IIIren kontra (40-38). Azken zatian eman zioten buelta partiduari, 31-35 galtzen zirela, baina larunbatean 39 tanto egitera behartuta daude.