Joan den larunbateko Plenoan, aho batez onartu zen hiri hondakinen bilketari buruzko kontsulta egitea eta balorazio oso positiboa egin du Gobernu Taldeak. Astigarragako EAJ-PNVk bere hauteskunde programan herri galdeketa egiteko asmoa jaso zuenean, erantzukizun haundiko konpromisoa hartu zuela nabarmendu du, «hautesleekiko ez ezik, astigartar guztiekiko». Hori horrela, adierazi du hau ez dela EAJ-PNVren kontsulta, ezta EAJ-PNVren gobernuarena ere; «astigartar guztion kontsulta da».
«Kontenedoreen sistema erosoagoa izateaz gain, araudiak eskatzen dituen bilketa portzeintaiak betetzen ditu»
Eta gaineratu du: «Kontsultak, aukera emango die herritarrei atez ateko sistemarekin jarraitu edo edukiontzi sistemaren aldeko apustua egin nahi duten erabakitzeko; jakina den arren, herritarrentzat kontenedoreen sistema erosoagoa izateaz gain, araudiak eskatzen dituen bilketa portzentaiak betetzen dituela».
«Herriaren erabakia errespetatuko dugu»
Kontsultaren emaitza zein izango den alde batera utzita, udal gobernuak herriaren erabakia errespetatuko duela argi utzi du: «Alderdi jeltzalea oso pozik dago bizilagunak izango direlako, askatasun osoz, erabakia hartuko dutenak. Izan ere, Bilduren aurreko gobernuak duela ia hiru urte ez zien erabakitzeko inolako aukerarik eman».
Egungo gobernuak kontsulta lantzeko prozesu partehartzailea egingo zuela ere, hitzeman zuela gaineratu du: «Parte Hartze Mahaien helburua izan da herriko elkarte ezberdinei zein bertaratu nahi izan duten bizilagun guztiei erabakitzeko prozesuaren parte direla erakustea».
Gobernu taldeak bilera horiek izan duten harrera eta parte hartzea positibotzat jo ditu, «bizilagunen inplikaziorik gabe ez zelako adostasun politikorik lortuko. Astigarragako biztanleak izan dira EH Bilduren jarrera aldatu eta zuzentzea lortu dutenak».