Zuzenketak aurkeztu dizkie Hernaniko EAJk, 2016ko Udal Aurrekontuei. Batetik, Osoko Zuzenketa bat aurkeztu du; eta bestetik, zuzenketa partzialak ere proposatu ditu, Gobernu Taldearekin akordioak lortzeko asmoz.
Osoko Zuzenketa aurkezteko, EAJk argudiatu du «desberdintasun haundiak» dauzkala Bildurekin, «gai askotan». Besteak beste, honako hauetan: nola gestionatu diru publikoa, nola izan behar diren udaletxearen erosketa prozesuak, udal funtzionarioekin harremana nolakoa izan behar den, izendapen askeko karguak beharrezkoak ote diren, oposizioko alderdiekin nolakoa izan behar den harremana, eta harreman instituzionalek nolakoak behar duten.
Izan ere, izendapen askeko langileek 138.000 euroko kostua izango lukete aurkeztu diren aurrekontuetan; Garapen Agentziako langileei 163.000 euro ordainduko lieke Hernaniko Udalak, «oraindik osatuta ez dagoenean»; eta Garbitaniari ordaintzen jarraitzen zaiola ere kritikatu du EAJk, 1.533.000 euro, «beste sistema ezberdinekin emaitza berdinak lortzen direla jakinda». Harrobiko basoaren garapenaz ez hitz egitea ere kritikatu du, «bere ordez Landare eta Zubipeko arazo larriak konpondu daitezkeenean, eta gure nekazal kirolentzat gune adierazgarri bat eratu».
13 zuzenketa partzial
Osoko Zuzenketaz gain, 13 zuzenketa partzial ere aurkeztu ditu EAJk, «akordioa bilatuz».
Hasteko, azaldu du espero duela «behingoz lortuko dela 1.057.000 euroko hirigintzako diru sarrera, aurrekontuan jasotzen dena, eta aurrekontua ez dela deskonpentsatua geratuko sarrera eta gastuen artean».
Atez atekoaren erreferenduma egiteko, partida bat
Bost partida berri sortzea ere proposatu dute: atez atekoari buruzko erreferenduma egiteko, «hondakinen gatazka honi behin betiko bukaera emateko»; Plazaren eta Tilosetako kioskoaren errehabilitaziorako; lanpostuen azterketa bat egiteko, «errealitatera egokitzeko, gehiegizkoa baita 300.000 euro gastatzea»; eta beste biak, ekaitzen tankea proiektua egin eta Landare azpian jartzeko.
Bestalde, eskatu dute gastu juridikoen saila desagertzea, eta baita izendapen askeko langileak ere.
Garapen Agentziako langile gastuetarako, dirurik ez
Udaltzain kopurua haunditu dadin ere nahi du EAJk, turno bakoitzeko bat egoteko gutxienez, eta bide garbiketara zuzendutako partida ere haunditzea, bere ustez «gutxi haunditu baita aurten».
Garapen Agentziaren kasuan, ordea, langile gastuetara dirurik ez bideratzea proposatu du, eta udal teknikarien esku uztea, beste Udalekin egin beharreko ekimenak.