Herritarrek aukeratuko dute aurten, aurrenekoz, zein izango diren Hernaniko Kirol Sariak jasoko dituztenak. Urtero bezala, herriko taldeek aukeratu dituzte hautagaiak, bost guztira, eta herritarrek izango dute azken hitza, banatuko diren bi sariei izen-abizenak jartzeko.
Horretarako, zabaldu dute botoa emateko epea, eta abenduaren 15era arte dago aukera. Bi bide jarri dituzte: Udalaren web orrian, www.hernani.eus, ‘Omenaldia Hernaniko kirolariei’ dioen atalean sartu eta formularioa beteta; edo kiroldegian jarri dituzten buzoietan bozkatuta. Elkarteek zein 16 urtetik gorako herritarrek eman dezakete botoa.
Bost hautagai eta bi sari
Bi sari banatuko dituzte aurten, eta bost hautagai daude. Emakumezko Kirolariari Saria jasotzeko, bi finalistak dira Amaia Irazustabarrena palista; eta HGEE gimnasia erritmikoko kadete taldea, June Elizalde, Ana Lujambio, Maddi Goikoetxea, Leyre Pascual eta Ane Descargak osatua.
Kirol Ibilbideari Saria jasotzeko, berriz, honakoak dira: Miguel Ezpeleta pelotari ohia, eta pelota eskolaren sortzaileetako bat; Roge Miguez, saskibaloi saila berriz martxan jarri zutenetako bat, eta orain arteko arduraduna; eta Ignacio Ocio, eskubaloi jokalari ohia, eta Hernanin eskubaloia berreskuratzen lagundu duena.