Lepo bete zen atzo Tolosako Usabal kiroldegia, Gipuzkoako Bertsolari Txapelketako bigarren finalaurrekorako. Unai Agirre hernaniarrak irabazi zuen saioa, eta horrela, zuzenean lortu du abenduaren 19an Donostian jokatuko den finalerako txartela. Finalera zein beste bertsolari pasako diren jakiteko, berriz, azken finalaurrekora arte itxoin beharko da; Eibarren izango da, igandean, 17:30etan.
Agirrek, puntuazio altuena
Atzoko saioa irabazteaz gain, Unai Agirre hernaniarrak orain arteko puntuazio altuena ere lortu zuen: 517. Bigarren geratu zen Beñat Gaztelumendi, 501 punturekin; hirugarren, Iñaki Apalategi, 493,5 punturekin; laugarren, Oihana Iguaran, 482 punturekin; bosgarren, Nerea Elustondo, 476 punturekin; eta seigarren, Beñat Lizaso, 458,5 punturekin.
Orain artekoak ikusita, Hernaniko Bertso Eskolako bertsolariak sasoi onean daudela argi geratu da, aurreneko lau sailkatuen artean hiru baitira eskolakoak: Unai Agirre, Beñat Gaztelumendi eta Agin Laburu; azken hau, 496 punturekin.
Finalean, bat baino gehiago
Oraingoz, Alaia Martin eta Unai Agirre sailkatu dira zuzenean finalerako, baina puntuazioak ikusita, Hernaniko eskolako bertsolari gehiago ere izango direla ematen du.