ELA, LAB, CCOO eta UGT sindikatuek deituta, 6 greba egun egingo dituzte Gipuzkoako sei paper enpresek, gaur hasi eta datozen 8 egunetan.
Hernaniko Zikuñaga, Amezketako Aralar, Elduako Munskjö, Zizurkilgo Oria, Andoaingo Itasa eta Aizarnazabalgo Zubialde dira Gipuzkoako 6 paper enpresak. «Denetan baiezkoa atera da», azaldu dute sindikatuek. Greba egingo dute, gaur, bihar eta etzi; eta abenduaren 1ean, 3an eta 4an.
Patronalak, berriz, Adegik, demanda sartu du, greba «tranposoa eta abusiboa» dela iruditu baitzaio.
Urtarriletik hona, 11 bilera
Sindikatuek eskatu dute Gipuzkoako hitzarmen probintziala errespetatzeko. «Abenduan egin genuen denuntzia, eta urtarriletik hona 11 bilera egin ditugu negoziazio mahaian, baina Adegik mahaia blokeatu du. Sinatutakoa errespetatzea eskatzen ari gara».
Lau sindikatuek hitzarmenean bi puntu jaso behar direla uste dute. Batetik, «Adegik planteatu dituen soldata igoerak baino handiagoak, eta KPIari lotuak; hau negatiboa balitz, igoera duina bermatzen duten klausulekin». Bestetik, bi blindaje, «Lan Erreformaren gainetik bere aplikazioa bermatzeko: hitzarmen probintzialean adostutakoa blindatzeko, eta ‘Non-Stop’ paktuetan adostutakoa blindatzeko».
Manifestazioa gaur Tolosan
Gaurkoa izango da aurreneko greba eguna, eta manifestazioa deitu dute, 11:00etan Tolosako triangelutik abiatuta. Larunbatean, kotxekarabana.