Azaroak 25, Emakumeenganako Indarkeriaren Aurkako Eguna da gaur eta Harituz elkarteak deituta, ekitaldia izango da 17:00etan, Foru plazan. Biolentzia matxistak eraildako emakume bakoitzagatik, haur patuko bat jarriko da, sinbolikoki. Herritarrei parte hartzeko dei egiten diete eta kandela bana eramateko. Minutu bateko isilunea ere egingo da.
Ondoren, 17:30etan, hitzaldia izango da udaletxeko Pleno Aretoan: Emakumeenganako indarkeria eusten duen patriarkatuaren oinarriak.
Kontzentrazioa, eguerdian
Udalak deituta, kontzentrazioa egingo da 12:00etan Foru plazan. Herritarrei dei egiten diete bertaratzeko.
Tailerrak Gazte Lekuan eta herri eskolan
Ostiralean, Astigarragako herri eskolako 5garren mailako ikasleentzat tailerra izango da. Maia Ansak emango du: Koedukazioa, indarkeriaren prebentzioa eta kirola.
Gazte Lokalean ere tailerra antolatu dute larunbatean (16:30). Brotxeak egingo dituzte, mezuak zabalduz.
«Denon erantzuna behar da; arazoa denona da»
Harituz elkarteak nabarmendu du urtero egiten direla elkarretaratzea eta aldarrikapen berdinak, baina egoera ez dela aldatzen eta gizonen eskuetan hiltzen jarraitzen dutela emakumeek: «1995etik 1.378 emakume erail dituzte eta aurten dagoeneko 55 biktima ditugu; 8 aurreko astekoak. Emakumeenganako indarkeria giza eskubideen urraketa larria da, eta bizi dugun generoen arteko desberdintasunaren adierazle da. Gizartearen pentsaeran eta paradigman aldaketa beharrezkoa da. Horretarako, erantzun globala beharrezkoa da, eta pertsona guztiok parte hartzea, diskriminazioarekin eta emakumeenganako indarkeriarekin bukatzeko; arazoa denona baita».