Ameriketako hizkuntza gutxituen egoeraz hitz egiten dute Beltzean Mintzo dokumentalean. Garabide elkarteak ekoitzi du, hizkuntza gutxituen arteko zubi lana bultzatzeko asmoz.
Gaur arratsaldeko 19:00etan ikusi ahal izango da, doan, Biteri kultur etxean, eta ondoren, Garabide elkarteko Txema Abarrategirekin solasaldia izango da.
Euskal esperientzia, hizkuntza berreskuratzeko eredu
Dokumentalean 7 hizkuntza komunitatetako 14 pertsona ageri dira, euskal esperientziak beraien hizkuntza berreskuratzeko balio ote dien aztertzen. Hain zuzen, Kitxua, nasa yuwe, nahuatl, kaqchiquel maia, Yucatango maia, aimara eta mapuzungun hiztunek hitz egingo dute.
Globalizazioaren eragina
UNESCOren datuen arabera, XXI. mendean hizkuntzak modu masiboan galduko dira; gaur egun, munduan 6.000 hizkuntza inguru hitz egiten dira, baina urtero 10 galtzen dira.
Horretan globalizazioak izan duen eraginaz ariko dira gaur, kultur aniztasuna sustatu beharrean, uniformatzearen alde egin baita.