markagailuak erakusten duen kolpe gogorra ez zen hainbesterainokoa izan, jokoan; 0-32 galdu zuen Hernanik. Santboianak hasieratik erakutsi zuen ligako oilarretako bat dela; eta Hernani eusten saiatu zen. Aurreneko zatia nahiko parekatua joan zen, nahiz eta kataluniarrak nagusi izan ziren markagailuan. Santboiana zigor kolpe batekin aurreratu zen 6garren minutuan. Partidua nahiko parekatua joan zen 27garren minutura arte; etxekoek egindako akats batek ordea, aldea haunditu zuen: Santboianak entsaioa egin zuen, eta 0-10 jarri zen aurretik markagailuan. Aurreneko zatiko azken jokaldian beste entsaio bat egin zuten kataluniarrek, eta 0-15eko aldearekin joan ziren atsedenaldira.
Bigarren zatian, gogotsu atera zen Hernani, markagailuari bueltako asmoz. Erasoaldi bat baino gehiago gauzatzeko zorian izan ziren trikoloreak; atzo ordea, entsaio lerroko azken metroak maldan gora izan zituzten. 47garren minutuan Santboianak hirugarren entsaioa egin zuen, eta punturen bat lortzeko esperantzak ihes egin zuen. Partidua bi entsaio gehiagorekin borobildu zuen Santboianak, 0-32 irabaziz.
Oroitzapen oneko zelaia, Alcobendasekoa
Denboraldiko hurrengo jardunaldia Alcobendasen kontra jokatuko du Hernanik, madrildarren zelaian. Oroitzapen oneko zelaia da Las Terrazas; izan ere, Hernanik han lortu zuen Ohorezko Mailara igotzeko pasea.