Bertakoak edo etorkinak, guztiak dira hernaniarrak, eta hori sendotu nahian dator gaurko ekimena. Gaur egingo diren 50 bazkariekin bilatu nahi da elkar ezagutzea, harremana sortzea eta egon daitezken aurreiritzi guztiekin haustea.
Ekimena SOS Arrazakeriak antolatzen du Europa mailan, eta Hernanin AMHERen babesa du. Urtetik urtera geroz eta gehiago dira animatzen diren herritarrak, eta aurtengo edizioak marka guztiak hautsi ditu 100 familia edo talde animatu baitira, ekitaldian parte hartzera. Bazkari baten bueltan biltzearekin lortzen dira hasieran aipatutako helburu horiek, eta hortik aurrera, denetatik gertatu izan da; batzuk harreman estua egiten dute, eta egunerokoan izaten dute erlazioa...
Partehartze igoera horretan ere, aipatzekoa da gazteen artean ekimenak izan duen arrakasta. Izan ere, aurten asko animatu dira; 50 bazkarietatik 11 gazteen artekoak izango dira. Sutu Hernanik ere bat egin du ekimenarekin, eta bazkaltzera joan aurretik topa antolatu du: Plaza Berrin izango da, eguerdiko 12:00etan. Eta bazkalosterako plana ere, egin dute: festa ere antolatu dute Gaztetxean; 16:00etatik aurrera, elkar ezagutu, tea hartu, kontaktuak eman eta harremanak sendotzen hasteko.