Gazteentzako plangintza polita antolatzeko konpromisoa hartu zuen Sutu Hernanik uda bukaeran, eta ordutik lanean ari dira, ekitaldi ezberdinak proposatuz. Hurrengo hiru hitzordu garrantzitsuak astebeteren buruan izango dira: hitzaldia, Bizilagunak ekimenaren bueltan antolatutako eguna eta bertso afaria.
Ostiralean Mexikori buruzko hitzaldia antolatu dute gaztetxean. Bi emakume mexikarrek emango dute hitzaldia; eta baita ere, bertan ibilia den lagun batek. Mexikoko iraultza, erresistentzia eta emakumeen hilketen inguruan ariko dira. Hitzaldia 19:00etan hasiko da Gaztetxean, eta interesa duten herritar guztiak animatu dituzte entzutera. Gainera, mexikoko janaria dastatzeko aukera izango da.
Bizilagunak, igandean
SOS Arrazakeriak eta AMHERek antolatutako Bizilagunak ekimenarekin ere, bat egin dute Sutu Hernaniko kideak. Igandean 11 bazkari egingo dira gazteen artean. Eguerdiko 12:00etan egin dute zita Plaza Berrin, elkartu, eta bazkaltzera joan aurretik elkarrekin topa egiteko. Bazkalostean berriz, festa antolatu dute Gaztetxean; 16:00etatik aurrera, elkar ezagutu, tea hartu, kontaktuak eman eta harremanak sendotzen hasteko.
Bertso afariko sarrerak, salgai
Datorren larunbatean berriz, hilaren 28an, bertso afaria antolatu dute Agin Laburu eta Beñat Gaztelumendirekin. Iluntzeko 19:00etan trikipoteoa antolatu dute Garinen. Bertso afaria berriz, 21:00etan izango da Gaztetxean.
Bertso afarirako sarrerak salgai daude Garin, Aker, Tripontzi eta Onddin; 15 euro ordaindu behar dute helduek eta 12 euro adin txikikoek.