Jakinminez gerturatu zen jendea estreinaldira

Gogotsu zegoen jendea proiek­tuaren emaitza ezagutzeko eta jende ugari gerturatu zen Ere­ñotzuko San Antonio elizara larunbat iluntzean. Burbunak eta etsa­yak dokumentala estrei­natu zuten, hau da, Dobera Eus­kara Elkarteak eta Aranzadi Zien­tzia Elkarteak egindako do­ku­mentala, Herna­ni­ko natu­ra­ri buruzko ahozko ondarea biltzen duena. Bertan izan ziren  Ima­nol Lizeaga auzo alkatea eta Aritz Zerain Ereño­tzuko Auzo Uda­laren izenean, eta Iñaki Sanz-Azkue eta Eñaut Agirre do­kumen­talaren egileen izene­an. Aurkezpen txiki bat egin ostean, dokumentala ikus­teko aukera izan zuten bertara­tuta­koek, eta ondoren, luntxa egin zuten.

Erantzunarekin pozik
Estreinaldira gerturatu zen jende pila ikusita, oso pozik geratu ziren egileak. Halaxe azaldu dio Agirrek Kronikari: «Denbora asko pasa dugu lan hau egiten, jendeak bazekien formatua, bazekien DVD bat aterako zela, dokumental bat egingo zela, baina jakinmin haundia zegoen emaitza ezagu-tzeko. Eta elkarrizketatu eta be­raien familiakoez gain, Ereño­tzuko auzotarrak eta Her­na­nikoak ere gerturatu dira. Baita kanpoko batzuk ere. Denon arte­an egindako proiektu bat da eta inplikazio hori nabaritu egi­ten da. Kasu honetan, Auzo Uda­lak jarritako ilusio hori konta­jiatu egin da herrita­rrengan ere». 
Dokumentala Doberak eta Aranzadik egina da, baina Ereño­tzuko Auzo Udalaren eta Hernaniko Udalaren laguntza izan du.

Abenduaren 4an Hernanin
Hernanin, abenduaren 4an izango da aurkezpena eta Agi­rrek espero du Hernanin ere, tankerako erantzuna izatea: «Hernaniar guztiontza­ko da interesgarria. Natura edo eus­ke­raren aldetik interesa daukaten guztientzako», dio. Hernaniko Udalak hartuko du parte eta Euskararen Eguneko ekintzetako bat izango da.
Horrez gain, DVDa laster jarriko dute eskuragarri.