Santa Zezilia Eguna bihar zortzi bada ere, Musika Bandak gaur ospatuko du musikarien zaindariaren eguna, eta horretarako, kontzertu berezia antolatu dute. Milagrosan izango da, iluntzeko 19:30etan hasita.
Kontzertu berezirako, gonbidatu berezi bat izango dute. Hain zuzen, tronpeta bakarlari batekin joko dituzte emanaldiko hiru kanta; Javier Lorente tronpeta jolearekin.
Zazpi pieza entzungai
Roberto Pachecok zuzenduta, zazpi pieza joko dituzte: Paco Molero, Candide, Gran Fantasia Rusa (Banda eta tronpeta), Bitz, Concierto de Aranjuez (Banda eta tronpeta), West Side Story, eta La Virgen de la Macarena (Banda eta tronpeta).
Tronpeta klasea, atzo
Javier Lorentek tronpeta klasea eman zien atzo Musika Bandako kideei. Eta ondoren, elkarrekin entsaiatu zuten gaurko emanaldia.
Lorente Ribaforadan (Nafarroa) jaio zen eta Musikenen eta Conservatorium van Amsterdamen egin ditu ikasketak. Hainbat orkestra nazional eta internazionaletan kolaboratu izan du eta tronpeta irakasle ere izan da.
Gaur egun, Madrilgo Udal Banda Sinfonikoko bakarlaria da.