Ereñotzuko Udazken Kultura itxiko du gaur, Burbunak eta etsayak dokumentalaren estreinaldiak; 18:00etan izango da, San Antonio elizan. Dobera Euskara Elkarteak eta Aranzadi Zientzia Elkarteak elkarlanean egin dute dokumentala. 25 elkarrizketa biltzen ditu, eta bertan, Hernaniko bailara ezberdinetako herritarrek, naturarekin izan duten lotura eta horrek utzi duen ahozko ondarea bildu dute.
Landare eta animaliei buruzko corpusa
Eñaut Agirrek, egileetako batek Kronikari azaldu zionez, elkarrizketak egin dituzte, landare eta animaliei buruzko Corpusa osatzeko: «garai batean normalagoa zen naturarekin bizitzea, eta gaur egun badira, oraindik ere, hala bizi direnak; hauengana jo genuen. Natura ezagutzen dute, guk gure herriko kaleak ezagutzen ditugun bezala. Eta hor, sekulako aberastasuna dago. Patrimonio edo ondare bat da herritar hauek naturarekiko duten jakintza; eta horrek utzi duen hizkuntza. Gaur Ereñotzura gerturatzen den guztiak izango du beraz, altxor honekin gozatzeko aukera.
Ederki ibiliak dira, Leitzako Peru Harri museora egindako bisitan
Udazken kulturalaren barruan, dozenaka ereñotzuarrek hartu zuten parte joan den astean Leitzara egindako irteeran; besteak beste, Peru Harri museoa bisitatu zuten. Ostegunean berriz, Chertat eta lehoiaren abenturez gozatu zuten txikienek!