Beste final bat jokatuko dute elkarrekin, Paul Ojuelek eta Markel Lizeagak. Donosti Gain torneo garrantzitsuko txapelaren lehian ariko dira bihar, goizeko 10:30etan Egiako frontoian, Eneko Yoldi nafarraren eta Ander Imaz oiartzuarraren kontra. Haiek izango dira faborito, bikote indartsua osatzen baitute, eta ez dute lan erraza izango hernaniarrek.
Dena den, sasoi puntu onean daude Ojuel eta Lizeaga, txapelketan erakutsi duten bezala, eta ezustekoa eman dezakete, beren maila onenean aritzen badira. Semifinaletan, Hernaniko beste bikote bat utzi zuten kanpoan, Arrietak eta Aizpitartek osatutakoa (22-11).
Arrietak eta Aizpitartek semifinala, Gipuzkoakoan
Egiako torneotik kanpo, Gipuzkoako Txapelketan zentratuko dira Ioritz Arrieta eta Eneko Aizpitarte gaurtik. Eta erronka polita daukate, gainera. Semifinaletako joanekoa jokatuko dute, 16:00etan kiroldegiko frontoian, Pagazpe taldeko Santxo eta Gorrotxategiren kontra; Gipuzkoako txapeldunen kontra, hain justu. Partidu zaila dute, beraz. Baina animoz gainezka iritsiko dira hernaniarrak, Egiako torneoan bertan, kanporatu egin baitzuten Pagazpeko bikotea.
Hernaniko Pelota Elkarteak zale guztiak animatu nahi ditu, frontoira hurbildu eta partidu haundi horretaz gozatzera: «ikuskizuna ziurtatuta dago».