«Gogor lan egiteko prest gaude, udan gure onena emateko», azaldu dute Hernaniko Arraun Elkarteko neskek. Badira hiru aste entrenatzen hasi zirela, arlo fisikoa lantzeko, eta gaur, lehenengo aldiz uretaratuko dute Maialen trainerua, Pasaian egingo duten entrenamendu irekian.
Arrauna probatu nahi duten 16 urtetik gorako neskak animatu nahi izan dituzte gaurko entrenamendura, eta aurrerantzean ere izango da aukera. Taldeak ia arratsaldero entrenatzen du Elorrabin duen egoitzan, eta gaurtik aurrera, trainerua ere gehiagotan uretaratuko dute, Pasaian. Probatu nahi duena harremanetan jar daiteke hernani.arrauna@gmail.com helbidera idatzita, edo Juantxo Etxarte entrenatzaileari deituta: 656 761 252.
Arraunlari berriei deia, denboraldia luzea baita
Hernani eta Tolosako arraunlariekin osatu zen iaz, lehenengo aldiz, Maialen trainerua, eta aurten ere taldea mantendu dute, gutxi-gorabehera. Hala ere, arraunlari berriak animatu nahi dituzte taldearekin bat egitera: «Momentuz kopuru polita dugu, baina denboraldia luzea izaten da, eta ongietorriak izango dira arraunlari berriak».
Arrauna ez da kirol xamurra, ordea, eta gauzak garbi esaten dituzte: «Argi dago arrauna kirol gogorra dela, eta ia egunero entrenatzeak errutina zehatz batean sartzen zaitu. Gainera, neguko hilabeteak luzeak egiten dira. Edonola ere, hor baldin bagaude zerbaitegatik da, arrauna gustuko dugulako».
«Herriaren ordezkari izatea oso polita da»
Hain zuzen, argi dago gehiago direla arraunera engantxatzen duten ezaugarriak.
«Egunero taldekideekin egoteak harreman berezi bat sortzen du guztien artean. Gainera, herrian zaleak izatea lortu genuen iaz, kalean batek baino gehiagok galderak egin zizkigun udan estropadei buruz, eta estropadetan gure aldeko animoak entzutea izugarria izan zen. Estropada bat bukatzen duzunean, nekatuta egon arren, gorputzean geratzen zaizun sentipena izugarria da, eta guztien artean giro ona izaten saiatzen gara, nekeari umorez aurre egiteko. Gauza horiek izaten dira gero jarraitzeko gogoa pizten dizutenak. Gainera, lehen aldiz lortu du Hernanik emakumeen trainerua uretaratzea, eta guretzat herriaren ordezkari izatea oso polita da».
«Estropadetan gure aldeko animoak entzutea izugarria izan zen»
Iazkoa hobetzea, aurtengo helburu
Oraindik goiz da aurtengo denboraldia nola joango den jakiteko, eta aurtengo helburuak zehazteko. Baina lehengo urteko esperientzian oinarrituta, aurreko denboraldian egindako lana hobetzea dute buruan.
«Iazko estreinaldia kontuan izanik, argi dago aurten iazkoa hobetzea izan behar dela gure helburua. Iazko esperientzia gainean dugu, eta pixkanaka gure prestaketa ere hobea da».
Horretarako, hainbat lan zehaztu dituzte, dagoeneko! «Oriaren jaitsieraz gain, jaitsiera gehiagotan ere parte hartzeko asmoa dugu; hala, neguan ere non gauden ikusiko dugu. Gero, liga ekaina inguruan hasiko da; bien bitartean, bateletan ere lehiatuko gara».
Kontxa, denboraldiari ginda jartzeko estropada
Ez da erraza izango, hala ere, lehenengo urteko markak hobetzea. Izan ere, gustora geratu zen kluba, Maialen traineruko arraunlarien lanarekin.
«Traineru berri guztien aurretik sailkatzea lortu genuen; Colindres, Oiartzun, eta Donostiarra; eta hori ez da gutxi. Kontxako sailkatze estropadan parte hartzea oso polita izan zen, eta denboraldiari bukaera polita eman genion».
Trainerua osatu zuten kide guztiak arraunlariak ziren, baina denentzako berria izan zen traineruan ibiltzea: «Ligan emandako mailarekin gustora geratu ginen».
«Traineru berri guztien aurretik sailkatzea lortu genuen, eta hori ez da gutxi»
Entrenamendu irekia, neska berriak erakartzeko
Lehenengo urteak utzitako zapore onari helduta, ilusio haundiarekin eta gogotsu hasi dute entrenamendu saioa, Maialen traineruko arraunlariek. Ilusio hori ingurura zabaltzeko asmoa dute, gainera.
Horregatik antolatu dute gaurko entrenamendu saio irekia, «neska berriak erakartzeko, sekula traineru batean arraunean ibili ez denak ere aukera hori izan dezan».
Ez dakite arraunlari berri askorik animatuko ote den gaurkoan, baina «ahalegina» egin dutela diote, «jendeak ikus dezala arraunlari berriak jasotzeko prest gaudela».
Gaurkoan Pasaian ariko dira entrenatzen, eta nahi izanez gero, ikustera ere gerturatu daiteke. Horrela, datorren astetik aurrerako entrenamenduetan parte hartzera ere animatuko da baten bat!