Hirigintza eta Ingurumen Saileko hainbat oharren berri eman du Udalak. Horien artean, Portuko errekaren egoera dela eta, txostena eskatu dio URA Agentziari. Hala azaldu dute: «Zenbait herritarrek salatu dute Portuko errekak (Akan, Muntto erreka) Hernaniko udalerritik igarotzean askotan izan ohi duen egoera kaskarra. Herritarrei Hernanirekiko ardura eskertzearekin batera, adierazi nahi dugu EAEko ibai eta erreken eskumena Eusko Jaurlaritzak duela, Uraren Agentziak zehazki. Hau horrela, Agentziari egoeraren inguruko txostena eskatu diogu. Txostena jasotzean Udalari dagokiona egingo dugu eta herritarrei gertaeren berri emango diegu».
Lizeaga auzoko irisgarritasuna hobetzen
Lehengo astean hasi eta hilaren bukaera bitartean, Lizeaga auzoko irisgarritasuna hobetzeko hainbat lan egingo ditu Udalak Larramendi, Victor Hugo eta Magdalena kaleetan.
Sagastiyako etxeetan akatsak zuzentzeko eskaera
Udalak azaldu duenez, Sagastiya eremuan egindako etxebizitza eta urbanizazioaren lehen erabilera baimena eskatu zion duela urte erdi inguru sustatzaileak Udalari. Eta Udalak erantzun zion etxebizitzak bukatuta egonagatik, urbanizazioan akats garrantzitsuak zeudela: «batetik udal argiteriaren instalazioa bukatu gabe dago eta bestetik plaza eta portxeetako zoladura edo pabimentua gaizki egina dago».
Etxebizitza eskuratzeko herritarrek duten premiaren jabe izanik, akatsak zuzentzeko eskatu izan diola behin baino gehiagotan azaldu du Udalak eta laguntza ere eskaini izan diola zeregin horretarako.
Eta gaineratu du: «Udalak gaiaren jarraipena egingo du sustatzaileak lehenbailehen akatsak zuzendu ditzan eta jendeak etxebizitzak eskuratu ditzan».