Estatu mailako mobilizazioa deitu dute gaur Madrilen, indarkeria matxista guztien kontra. Estatu osoko emakume mugimenduek eta mugimendu feministek deitu dute martxa, eta Astigarragan, Harituzek bat egin du ekimenarekin. Martxari ahotsa emateko asmoz, prentsaurrekoa eman zuen udaletxean, udal ordezkari guztien presentziarekin.
«Kontzientzia hartzea eskatzen dugu»
Politikoek duten borondate faltari aurre egin, eta Madrilgo kaleak hartzeko asmoz antolatu dute martxa: «politika firmeak eskatuko dizkiogu estatu espainiarrari, hezkuntza, prebentzioa eta indarkeria matxista jasan duten emakumeengan arreta jartzeko». Harituzeko ordezkariek azaldu zutenez, kontzientzia hartzea eskatzen dute: «estatuaren ardura dela uste dugu, eta kontuan hartzea eskatzen dugu. Indarkeria matxistak eta emakumeenganako indarkeriak denon arazoak dira eta horretarako jendarte osoa mobilizatu behar dugu, martxa honetan parte hartzera deitu».
Probintziako plataformak Gipuzkoa A7 Indarkeria Matxistaren Aurkako Martxa izena du, eta Astigarragako Harituzek bat egin du honekin: «gure komunitatean osatu genuen plataforma izan zen. Harituzek bat egin du, eta elkarrekin antolatu dugu Madrilen egingo den martxara joateko modua».
«20 urtean 1.378 emakume erail dituzte»
Harituzek gogoratu du, 1995etik 1.378 emakume erail dituztela espainiar estatuan: «indarkeria matxistaren ondorioz hil dira. Aurten 70 emakume baino gehiago erail dituzte Espainian. Euskal Herrian ere, izan dira hilketak. Aurten 6 emakume hil dituzte, eta 3.200 denuntzia baino gehiago jaso dira.
«Astigarragatik 18 lagun aterako dira, autobusean»
«Gure borroka estatuaren ardura izatea eskatzen dugu»
Antolatzaileek eskatzen dute, borroka estatuaren ardura ere izatea: «Estanbuleko konbenioa garatzea eskatzen dugu. Konpromisoa hartzea eskatzen diogu Estatuari, indarkeria matxistaren kontrako borrokaren parte izatea, zentzu guztietan: prebentzion, erreperazioan...».
«Aurreneko mobilizazio erraldoia izango da»
300 autobus aterako dira Estatu osotik, eta Astigarragatik ere aterako da bat, 18 lagunekin; goizaldeko 02:30etan aterako da autobusa, Barandiaran Plazatik: «aurreikuspen guztiak hautsiko dituen martxa izatea espero da. Indarkeria matxistaren aurka antolatzen den aurreneko martxa erraldoia izango da. Gainera, Europan ere, jarraipena izango du Parisen, Bruselasen, Dublinen... Martxa 12:00etan abiatuko da Osasun Ministeritzatik.