Erremonteko Binakako Txapelketaren 45garren edizioari emango zaio hasiera gaur, arratsaldeko 16:00etatik aurrera, Galarretako frontoian.
Guztira, sei bikotek hartuko dute parte, eta tartean izango da Barrenetxea IV hernaniarra. Hain zuzen, gaur jokatuko du Ezkurra IIrekin, Urriza eta Agirrezabalaren kontra. Bestalde, txapelketaren barruan beste partidu bat ere izango da gaur jokoan; Ezkurra-Endika eta Matxin III-Ionen artekoa.
Ligaxkan denak denen kontra
Aurtengo jokoan lehengo urteko sistema erabiliko da. Sei bikote ariko dira txapela lortzeko lehian: Urriza-Agirrezabala, Ezkurra II-Barrenetxea IV, Ezkurra-Endika, Etxeberria IV-Etxeberria III, Uterga-Olazar eta Matxin III-Ion.
Gaur hasi eta azaroaren 28ra bitartean 15 partiduko ligaxka jokatuko dute, eta denak denen kontra ari beharko dute. Finalerdietara pasako direnak izango dira puntu gehien lortutako aurreneko lau bikoteak.
Puntu sistema iazkoa izango da: partidua irabazten dutenek 4 puntu jasoko dituzte; galdu, baina 36 eta 39 tantoren artean egin dituztenek, 2 puntu; galdu, baina 32 eta 35 tantoren artean egiten dituztenek, puntu bakarra; eta 32 tanto baino gutxiago eginez gero, punturik ez.
Laugarren eta bosgarren saikatuek puntuak berdintzen badituzte, bien arteko partidua irabazitako bikoteak egingo du aurrera.
Bikote parekatuak osatu dituzte, baina Urriza eta Agirrezabala jotzen dituzte indartsuenen artean. Gaur ikusiko da.
Finalerdietan, bina partidu
Finalerdiak abenduaren 5 eta 12an jokatuko dira, bina partidutara. Aurreneko bikote sailkatua laugarrenaren kontra ariko da, eta bigarrena, hirugarrenaren kontra.
Bikote bakoitzak partidu bana irabaziz gero, partiduetako tanteoa izango da kontuan, eta tanteoan ere berdinketa izanez gero, bigarren partiduko irabazlea pasako da finalera.
Abenduaren 19an finala eta aurrelari eta atzelari onenei trofeoak
Txapelketako final haundia abenduaren 19an jokatuko da, partidu bakarrera, finalerdietako bi bikote irabazleen artean.
Horrez gain, ligaxkako eta finalerdietako partiduak kontuan hartuta, trofeoak banatuko zaizkie aurrelari eta atzelari onenei; egindako tantoei kale egindakoak kenduta egingo da balorazioa, trofeo horiek banatzeko.
Bikote parekatuak
Antolatzaileen esanetan, ahalik eta bikote parekatuenak osatu dituzte Txapelketa jokatzeko. Horrela, bikote guztietan dago noizbait txapelketa irabazitako erremontistaren bat: Ezkurra (1994, 1999, 2006 eta 2014); Ion (2011, 2013 eta 2014); Etxeberria III (2010); Barrenetxea IV (2012); Urriza (2001, 2008, 2010 eta 2012); eta Uterga (2013).
Jokalariek, ordea, garbi dute zein izango den garaitzen bikote zailenetakoa: Urriza-Agirrezabala. Gaur ikusi ahal izango da, hasiera nolakoa egiten duten.