Batzarra antolatu du gaur Hernaniko Gure Esku Dagok, eta herritar guztiei luzatu die deia, bertaratu eta parte hartzeko: «zure iritziak garrantzi haundia du!». Biterin izango da, goizeko 10:00etan hasita, baina ordu erdi lehenago elkartuko dira bertan, 09:30etan, gosaltzeko. Eskura prozesuaz ariko dira bileran, eta horren bai-tan landuko dituzte, Eskura agiria bera, Euskal Herri mailan antolatuko diren ekintzak, eta Hernanin egiteko asmoa daukatenak.
Ametsen kriseilua eta herri kontsulta, aurreikusita
Herrian bertan egin nahi dituztenen artean daude, hain justu, ametsen kriseilua, aurreko urtean ere egin zena urtezahar egunean; eta herri kontsulta, 2016 urtean Hernanin egiteko asmoa dutena, beste zenbait herritan bezala: Goierriko eskualde osoan, Diman, Ispasterren...
Herri antzerkiaren aurkezpena, Tilosetan
Beste ekimen bat ere prestatu dute Hernanin bertan, eta gaur aurkeztuko dute: herri antzerkia. Batzarra bukatzen dutenean emango dute horren berri, 13:30etan, Tilosetako eskaileretan. Aurreratu dute, sketch bat ere prestatu dutela gaurko.