Etxe batean biltzen ziren hasiera hartan, lagun gutxi batzuk, eta multzoa haunditu bezala, Alkoholiko Anonimoen Santa Barbara taldea sortu zuten, 1968ko urriaren 15ean. 47garren urteurrena ospatu dute, beraz, egunotan.
Plazako lokal batean hasi ziren, egun Musika Eskola den lokalera mugitu ziren gero, eta Sandiusterrira azkenik. Bertan biltzen dira astelehen eta ostiraletan, 19:30etan, terapia itxiak egiteko. Eta ostegunetan, 19:00etan, interesa duten guztiei informazioa emateko egoten dira bertan, gaixo alkoholikoei laguntzeko programaren berri emateko.
Esperientziak konpartitu, anonimotasuna gordez
Terapia saioetan, beraien esperientziak konpartitzen dituzte, guztien anonimotasuna gordez, «hori baita errekuperazioaren oinarria». Iritsi berriei, edan gabe mantentzeko aholkuak jarraitzeko gonbitea luzatzen zaio, eta norberak erabakitzen du probatu nahi duen edo ez: «alkoholarekin arazoak dituztela uste duten guztiak animatu nahi ditugu, gurekin harremanetan jartzera». 943 33 11 03 telefonoa daukate horretarako, 566 luzapenarekin.
«Alkoholismoa ez da bizioa, gaixotasuna da»
Taldeak gogorarazi nahi du, alkoholismoa ez dela bizioa, «gaixotasuna baizik; sendatu ezin dena, progresiboa eta zoritxarrekoa, baina gelditu daitekeena. Eta horretarako, alkohola uzteko benetako gogoa eduki behar da. Gure helburu bakarra da, edan gabe mantentzea eta beste alkoholikoei ere horretan laguntzea».