Web aplikazio berria, demografia datuak ezagutu eta elkarbizitza sustatzeko

Astigarragako Udalak elkar­bizitza sustatzeko eta Harrera Protokoloa martxan jartzeko lehenengo urratsa eman du: web aplikazio berri bat sortu du Udalaren web gunean. Publikoa eta irekia da eta Astigarragan erroldatutakoen inguruko datuak ikusi daitezke bertan. Ostegunean aurkeztu zuten.
Zorione Etxezarraga zine­go­tziak honakoa azaldu zuen: «Jatorri anitzeko herritarrak bizi dira Astigarragan. Hori horrela, Harrera Protokolo baten beharra zegoela ikusi zen aurreko legegintzaldian. Bildu gobernuan zegoela jarri zen martxan proiektua eta guk jarraitzea erabaki dugu, herrira bizitzera datorren jendeari harrera nola egin jakiteko». Aztikerrek egin du ikerketa, diagnostikoa. 
Aztikerreko kideek azaldu zuten, gaur egun identitateari dagokionez, oso atomizatuak bizi garela (Perukoak, Peru­koe­kin ibiltzen dira; Sala­man­cakoak, Salamancakoekin...) eta hor hutsuneak sortzen direla: «Elkar harremanik ez dago eta elkar ezagutzeko lehe­nengo urratsa emateko balioko du tresna honek. Erakutsiko du argazki bat, astigartar guztiok nolakoak garen eta nongoak garen. Inportantea da estereo­tipoak deseraikitzeko».

Datu eguneratuak
Aplikazio berriak Jatorri Aniz­tasuna Zenbakitan izena du eta datu eguneratuak eskaini­ko ditu; 2015eko datuak, hain zuzen. 5.687 biztanle daude Astigarragan. Horietatik %83,2 Euskal Herrian jaiotakoak dira: %79,8 Gipuzkoan eta %21,8 Astigarragan. Desa­nexioa kon­tu­an hartzekoa dela azpima­rratu dute, 40 urtetik gorakoak Donostian erroldatuta baitau­de. Horrez gain, esanguratsua, 70eko hamarkadan, espainiar esta­tutik etorri zirela herrira, industrializazioa zela eta. Azken bi hamarkadetan, be­rriz, beste herrialde batzue­tatik. Eta adinari dagokionez, Astigarra­ga herri “gaztea” da Europa mailan.

Harrera Protokoloa, diseinatzen
Hemendik otsailera bitarte, Astigarragako Harrera Proto­ko­loa Diseinatzeko Prozesua ja­rriko da martxan. Harrera, hiru dimentsiotan landuko da: Udal ordezkarietan, harrera institu­zio­na­lean; hezkuntza komuni­ta­tean; eta herritar antolatue­tan, eragile sozialetan.
Hiru pauso emango dituzte: abendura bitarte diag­nosia egingo dute eta propo­samen zirriborroa; urtarrilera arte zirriborroa zabaltzeko bilerak; eta urtarrila-otsailean protokoloa martxan jarri eta baloratu.