Eguraldiak eutsi zion, eta gustura asko egon ziren berrogei lagun inguru, pasa den larunbatean, izarrei begira. Herrigintza Eskolen barruan, saio berri bat egin zuten, Aranzadiko astronomoek lagunduta. Joan den urteko arrakasta ikusita, errepikatzea erabaki zuten.
Gaueko hotzari aurre egiteko, elkarri arrimatuta ikusi zituzten izarrak larunbatean. Aranzadiko lau lagunek eman zituzten azalpenak, eta zaletu baten teleskopioak ere izan zituzten, bertaratutakoen gozamenerako.
Lehendabizi Aranzadiko adituen azalpenak entzun zituzten, eta ondoren, teleskopiotik teleskopiora, Andromeda galaxia, hildako izar bat, izar pilaketa bat... ikusi zituzten. Gainera, ez zen aurrekoan izandako jendetzarik gerturatu, eta erraz mugitzeko aukera izan zuten.
Eskerrak, Suroko bizilagunei
Suron, Ixerkeiko zabalean egon ziren izarrei begira. Udaletik eskerrak eman nahi dizkie Suroko auzokideei, eta barkamena eskatu, farolak itzalita egon ziren bitartean sortu zitezkeen eragozpenengatik.