Auzo Festa, egun inportantea izaten da Udazken Kulturalean, eta igandean jende ugari bildu zen Ereñotzun. Astean zehar ere, Iñaki Olaizola antropologoaren hitzaldia, Aritz Arrondoren irudi emanaldia eta pelikula izan dira.
Datorren astean, berriz, Jakoba Errekondok Bizi baratzea liburua aurkeztuko du, ostegunean, eta ostiralean, Dobera Euskara Elkartearen Zozomikoteak ipuinaren kontaketa egingo da, 18:00etan Auzo Etxean.
Patinetan ibiltzeko hitzordua, atzeratua
Arratsaldea patinetan ibiltzen pasatzeko zita, berriz, atzeratu egin da. Oraingoz, datorren hilean hastea espero dute antolatzaileek.
Mendi irteera, bihar
Bestalde, hileko azken igandeetan mendi irteera egiteko asmoa dute. Bihar egingo dute aurrenekoa; goizeko 09:30etan jarri dute zita, parkean, Ugaldetxo aldera joateko.
Lizarrara irteera, atzeratua
Auzo Udalak jakinarazi du lehengo larunbateko adinekoen irteera bertan behera geratu zela, baina jarri dute irteera egiteko egun berria.
Datorren larunbatean, hilak 31, joango dira Lizarrara dagoeneko izena emandakoak. Programatuta zegoen moduan, goizeko 08:00etan abiatuko dira; aurrena, trufaren museoa bisitatuko dute, eta segidan, Iratxeko bodega. Ondoren, bazkaria eta Lizarran barrena bisita izango dituzte.