Uholdeen kalte eta enbarazuak gutxitzeko asmoz, bi proposamen aurkeztu ditu EH Bilduk, Astigarragako Udalean. Batetik, babes neurriak hartzeko dirulaguntza programa bat prestatu du; eta bestetik, gaia landuko duen batzorde berri bat sortzea eskatu du: Uholdeen Aurkako eta Ibaiaren Aldeko Batzordea, hain justu.
Dirulaguntza programaren proposamenak, «azken uholdeetan herritarrekin hartutako konpromisoari erantzuten dio», Andoni Gartziak azaldu duenez. Etxebizitza jabeei, elkarteei eta lokalei zuzendutako dirulaguntza da, eta 40.000 euroko partida bat bideratu zuen horretara aurreko Gobernu Taldeak, legegintzaldia bukatu baino lehen.
Lanen kostuaren %75a, Udalak finantziatuta
Helburua da, etxe eta lokalen atarietan babesak jarri eta estolderietatik ur sarrera ekiditeko lanak egiten laguntzea. Horrela, Udalak lanen kostu guztiaren %75a finantziatuko luke, 2.500 euroko mugarekin.
«Diruz lagunduko dena da, etxe eta lokaletako sarrerak barrera desmuntagarriekin babestea; horrela, urak gainezka egiten duenean, ateetatik ura sar ez dadin. Gainera, ura etxe eta lokaletan estolderietatik barrena sar ez dadin, klapeta edo tapoiak jartzeko lanak ere diruz laguntzeko aukera izango da», azaldu du EH Bilduk.
«Uholdeen aurkako neurriek ezin dute etenik izan»
Modu berean, kritikatu du Gobernu Talde berriak «albo batera» utzi duela uholdeen afera: «honen erakusle, burutzen ari zen ur eta saneamendu sareen ikerketa gelditu dela, eta Udaleko teknikariek eta oposizioak ez dugula inolako aurreikuspenik. Egoerarekin larrituta, uste dugu uholdeen aurkako neurriek ezin dutela etenik izan».
Horregatik, bigarren proposamen bat ere egin du: «uholdeak hizpide nagusi izango dituen batzordearen osaketa eskatu dugu. Bertan, alderdi politiko guztietako ordezkariek parte hartzea proposatu dugu eta herritar eta kaltetuek ateak zabalik izango lituzkete, noski. Horiez gain, Udalean uholdeen gaiaz arduratzen diren sailetako teknikariek parte hartzeko elkargunea izatea nahi dugu, uholdeen aurkako neurriak modu eraginkorrenean eta koordinatuenean aurrera eramateko».
«EH Bilduren jarrera eraikitzailearen islada dira bi proposamenak»
Andoni Gartziak nabarmendu du, «EH Bilduren jarrera eraikitzailearen islada» direla bi proposamenak: «Gobernuko ardurak izan ez arren, Astigarraga hobea izateko ari gara lanean, Udal Gobernuari proposamenak bideratzen; euren lan eta arduretan lagundu eta bidea errazten, gure erantzukizunei muzin egin gabe».