Gizon taldearen 10garren urteurrena ospatzeko asmoz, Ez gara Palestinaz ari ikuskizunaz gozatzeko aukera izango da gaur Biterin. Bertsoak, antzerkiak eta musikak bat egiten dute, Imanol Kamio, Aitor Atxega, Ander Lizarralde eta Unai Muñoa protagonista diren emanaldian. Aurreneko biek jarriko dute musika: pianoa, akordeoia eta gitarra; eta beste biek, bertsoak. Lizarraldek Kronikari azaldu zionez, emanaldi honen helburua da urteurrena ospatuz, taldea indartzea: «ikuskizunean egiten dena da, taldean egiten dena. Gizonen aldetik ezohikoa den biluzte bat egiten dugu». Emanaldia iluntzeko 19:00etan izango da Biterin, eta herritarrak animatu dituzte gerturatu eta disfrutatzera. Oraindik sarrerarik ez duenak ordubete lehenago eskuratu ahal izango ditu, Biterin bertan.