Izan Gizon Taldeak 10 urte egin ditu, eta «adin desberdinetako 50-60 lagun pasa dira bertatik; 16-17 urtekoak edo 82ko bat», Ibon Arrizabalaga, orain arteko dinamizatzailearen esanetan.
Urteurrena ospatzeko, besteak beste, Ez gara Palestinaz ari ikuskizuna antolatu dute ostiralean. Era berean, Arrizabalagak, dinamizatzaile testigua pasa dio Ander Lizarralderi. «Gizonen arteko kontaktu eta ezagutza esparru bat sortzea lortu da, eta asmatu dugu adin eta izaera desberdinetako gizonak elkarren lagun izaten». Datozen erronkei, Lizarraldek helduko die.
«Iniziatibaz eta gogoz»
Lizarralderekin batera, lau kide elkartzen dira, hilero, bigarren asteazkenetan, 18:30etan Plaza Feministan.
«Kopuruz ahul xamar gabiltza, baina iniziatibaz, gogoz, indartsu dagoen taldea da. Horren ondorio da ostiraleko emanaldia antolatu izana», dio Lizarraldek. Taldea indartzen jarraitzeko asmoa ere badute, hala ere. «Nahi duena harremanetan jarri daiteke gurekin: izangizonhernani@gmail.com edo Facebooken, Izan Gizon Hernani orrialdean, eta astaezkenetan azaldu».
Hernaniar gehiago biltzea, helburuetako bat
Hain zuzen, jende berria, eta bereziki, Hernanikoa animatzea dute helburuetako bat. Hori izan da, Arrizabalagaren ustez, 10 urte hauetako «ahuldade» bat. «Ez da nahikoa hernaniar elkartu, eta beraz, ezin izan da beraien arteko berezko harremana sortu, eta herriko errealitatearekin lotu».
«Zein gutxirekin lortu daitekeen gure mugak gainditzea!»
Gainontzean, beste hiru helburu ere finkatuta dauzka Lizarraldek. «Taldea indartzea, batetik. Bestetik, egunerokoan ez daukagun espazioa sortzea, eta ez bakarrik, alderdi pertsonala lantzeko, baizik eta ikusteko gizartean zein paper jokatzen dugun. Eta azkenik, mezu bat gizarteratzea; gizarte parekideago bat lortzeko gure aportazioa egin eta eragin bat ikus dadin».
Lorpen harrigarriak
Oraingo taldea ez da zerotik hasiko. Izan ere, Arrizabalagak gogoan ditu orain arteko lorpenak. «Ikasi dugu lehiazko harremanak ez direnak edukitzen. Asko konturatzen ziren ezin zutela koadrilan, betiko lagunekin hitz egin. Besteak esateko daukana entzun eta gero hitz egin; esan zurea, zuretik, eta ez besteari kontra eginez, lehian. Gauza harrigarriak gertatu dira; 2 saiotara etorritakoek gertuagoko harremana zuten betiko lagunekin baino. Zein gutxirekin lortu daitekeen gure mugak gainditzea! Bakoitzak lorpenak izan ditu etxean, bikote harremanetan, seme-alabekin... Norberari axola zaion harremanetan onura sumatu dutelako etorri dira.