Hernanin alokairua sustatu nahi du Udalak, eta bide horretan, pausu bat gehiago eman du: etxebizitzak alokairuan hartzeko dirulaguntzak emango ditu. 164.000 euroko partida jarri du horretarako, eta bi modalitatetan banatuko du: erdia, 82.000 euro, 18-35 urte bitarteko gazteentzat izango da; eta beste erdia, 36 urtetik gorako helduentzat.
«Gazteek emanzipatzeko duten zailtasunari aurre egiteko bideetako bat»
Garazi Etxarrik, Gazteria zinegotziak azaldu zuen moduan, joan den urtean gazteekin bi prozesu egin zituen Udalak. Bertan egin zen diagnostikoetako bat izan zen, gazteek zailtasunak dituztela emanzipatzeko: «hitz egin zen, dirulaguntza batekin erraztasun gehiago izango zutela etxetik ateratzeko. Hala, aurrekontu partehartzialeetan 164.000 euroko partida bat ematea erabaki zen, etxebizitzak alokairuan hartzen dituztenei laguntzeko». Etxarrik azaldu zuen moduan, Gazte Kontseilu bat ere badago, hiru aldiz bildu dena: «Udalak beraiekin batera erabaki ditu dirulaguntza banatzeko irizpideak».
Beatriz Menak, Haur, Gazte eta Nerabeen sustapenerako teknikariak azaldu zituen dirulaguntzaren nondik norakoak. Menaren esanetan, bi helburu ditu laguntza honek: «gazteei emanzipatzeko laguntza ematea; eta modu orokorrean, herritarrei ere laguntza ematea». Baldintzen inguruan ere, hitz egin zuen Menak: «Hernanin erroldatuta egon behar da, gutxienez urtebete. Alokairu kontratu bat izan behar da norberaren izenean sinatua, eta 12 hilabeteko iraupena izango duena. Gehienez 600 euroko alkilerrak onartuko dira. Urteko diru sarrerak eta bizikidetza unitatea izango dira kontuan: pertsona bat denean, urteko sarrera gordina ezingo da 25.000 euro baino gehiagokoa izan; eta bi edo gehiago direnean, 32.000 euro baino gehiagokoa. Beste hainbat franja ere zehaztu dira; esaterako, pertsona bakarra denean, eta ez denean 19.000 eurora iristen, gehienez alokairuaren erdiarekin lagunduko dio Udalak». Baldintza hauek eta beste guztiak ikusteko: www.hernani.eus.
Eskaera epea, zabalik
Eskaerak gaurtik azaroaren 9ra egin daitezke Herritarren Harrera Zerbitzuan, 08:00-19:00 ordutegian. Webgunean ere egin daiteke eskaera, telematikoki.