Kamaren gaian, erantzuna eman nahi diote sozialistek Alkateari: «Prentsari emandako informazioan, Alkateak onartu egin zuen kamara bat bazegoela, disuaditzeko asmoz, eta ez zuela grabatzen. Oraindik ere egoera larriagoa dela iruditzen zaigu PSE-EEko kideoi, herritarrei gezurra esatea delako, eta nahita. Udaletxea, arau batzuk bete behar dituen instituzioa da, eta ez etxeko baratzan, sagarrak ez lapurtzeko gezurrezko kamarak jartzen dituena».
Elizatxoko kamarari buruz ari dira eta gaineratu dute datuen Babeserako Euskal Agentziaren 2015eko maiatzaren 11ko informeak azaltzen zuela, kamara hori bazegoela eta Udaltzainen zuzendariak azaldu zienean ez zuela grabatzen, Udalari eskatu ziotela erretiratzeko. «Beraz, kamara hori PSE-EEren salaketagatik erretiratu zen», gaineratu dute.
Ondoren, ekainaren 24ko Gipuzkoako Aldizkari Ofizialean, Udalak kamarak jartzeko zuen akordioa argitaratu zela nabarmendu dute eta Ricardo Crespo bozeramailearen esanetan, «argi geratzen da Udalak pausoak ematen jarraitzen zuela kamarak jartzeko».
Kontsultarako prest
Harrituta daudela ere azaldu du: «Erabakitzeko eskubidearen alde dagoen koalizio batek, defenditzen duen hori betetzeko eskatzen zionean beste alde batera begiratzeak, harritu egiten gaitu. Hernaniko alderdi sozialista akordio bat lortzeko prest dago hondakinen bilketaren inguruko kontsulta serio bat egiteko». Eta gaineratu du: «Gai honen inguruan akordioa eta kontsentsua lortu liteke, denok arintzen baditugu gure jarrerak, Astigarragan erakusten ari diren bezala».