Azken Obra eta Zerbitzu Batzorde Informatiboan jakitera emandako hainbat gairen berri eman du Udal Gobernu Taldeak, prentsa ohar bidez.
Besteak beste, «udalbatzak eta teknikariek martxan dauden obra ezberdinen egoera eguneratu zuten», eta horrez gain, jakinarazi dute «gobernu jeltzaleak aurreko legealdian hasi zituzten proiektuetan lan egiten jarraitzea aurreikusten» duela.
Anuskako obren bigarren fasea idazten
Egindako eta bukatutako lanen artean, Gobernu Taldeak azpimarratu du Anuska guneko obraren aurreneko fasearen bukaera. Era berean, «bigarren faseko proiektuaren erredakzioa hasiko» dela azaldu du. «Garapen-plan berriak Anuska auzoko sarrera egokitzeko eta Santiagomendi hegaletik jaisten den uraren bilketa hobetzeko helburua dauka».
Ikastolako oinezkoen sarbidea berregiteko asmoa
Bukatutako beste obren artean, ikastolaren handitze lanak aipatu ditu Gobernu Taldeak. Baina «udaletxeak oinezkoen-tzako sarbidea berregitea aztertuko» duela azaldu du. «Egin den sarrerak ez du eskuragarritasun arautegia bete-tzen, eta honek, gurasoei ikastolara sartzea erraztu ordez, trabak jartzen dizkie, batez ere, ume aulkia daramakitenei. Udalbatzak badaki herriko familiak ez daudela pozik obren emaitzarekin, eta, horregatik, lanean jarraituko du sarbidea hobetzeko».
Haurreskola laster irekiko da
Bestalde, jakinarazi dute Kiriketa haurreskola publikoaren obrak «hurrengo egunetan» bukatuko dituztela, eta «udal gobernuaren ustez, umeak eraikin berrian azaroaren erdialdera» sartuko direla, «lokala behar bezala ekipatu ondoren».
Hurrengo lana, bidegorria
Azkenik, bidegorriaren obra astelehenean esleituko dela azaldu du. Bidegorria Kale Nagusitik Zarkumendegiraino joango da, eta obrak «6 hilabeteko iraupena izango du», Udalaren ustez.