Kale eta plazen izendegien azterketatik abiatuta, Andrekale berreskuratzeko proiektua jarri zuen martxan Kalandria taldeak eta proiektu horixe aukeratu zuen Tabakalerak, Komanditario Berriak ekimenaren barruan.
Orain, proiektua artelan bihurtu behar dute eta horretarako ardura dute Señora Polaroiska taldeko kideek. Bideo bat grabatuko dute, hain zuzen, «emakume hernaniarren kemena, indarra, balentria, dibertsioa eta gozamena aldarrikatuz». Eta bideo horretako pasarte bat, urriaren 25ean grabatuko dute Andrekalen. Grabazio horretarako herritarren laguntza behar dutela azaldu diote Kronikari eta deialdia zabaldu dute. Hernaniko 200 emakume elkartu nahi dituzte egun horretan.
Emakumeen presentzia publikoa aldarrikatzeko
Emakumeen presentzia publikoa aldarrikatzeko festa moduko bat izango dela azaldu dute Señora Polaroiskako kideek: «Emakumeek Andrekalen izan zuten presentzia gogorarazi nahi dugu. 200 emakume elkartu nahi ditugu kalean, bertan eseri, kartetan jolastu, hizketan aritu, edan edota erretzeko, elkarrekin herriaren espazioez gozatuz. Bideoaren atal honek bizitza disfrutatzen, herriko kaleak aldarrikatzen eta denbora gustora pasatzen duen emakumea irudikatuko du. Ez al zara zu horietako emakume bat?».
Kartak, arropa beroa...
Grabazioa 10:00etatik 14:00etara izango da eta arropa erosoa eta beroa eramateko gomendatu dute. Horrez gain, kartak eramatea ere eskertuko dutela azaldu dute.
Mitologia berri bat
Señora Polaroiska taldeko kideek, Hernaniko emakume horien historia berri bat proposatu nahi dute, edo hobeto esanda, mitologia berri bat: «Emakumeok paper hori betetzeko zailtasun gehiago izan ditugunez, hiru pertsonai berri sortu eta barneratuko ditugu Hernaniko herri-historian». Pertsonaia mitologikoak honakoa izango dira: Gudaria, migrantea eta alperra.
Izena, emailez
Grabaziora azaltzeko asmoa dutenek, izena eman behar dute, zenbat jende bilduko den jakin dezaten: andrekale.filmazioa@gmail.com.