Harituz elkarteak lanean jarraitzen du, berdintasunaren alde, eta biolentzia matxistaren kontra. Hainbat ekintza antolatu ditu datozen asteetarako.
Hasteko, atzo hasi zen Esperientzien Eskola. Aurreneko bi saioetako gaia izango da Gudu Santua, eta gaztelaniaz emango da. Doan da, eta informazio gehiago eskatzeko telefonoz deitu daiteke: 630 678 474. Era berean, ondoren, azaroaren 25erako kamisetak eta bestelakoak josten eta osatzen aritu ziren.
Pasaiara, bufanda josten jarraitzeko
Hurrengo zita, berriz, urriaren 24rako jarri dute. Egun horretan, Pasaiara joango dira, hango emakumeekin joste eguna antolatu baitute. Bufanda Asturiasen dago orain, baina matazak josten jarraitzen dute, bufanda hori are luzeagoa egiteko.
‘Loreak’ pelikularen aurkezpena
Beste zita bat hilaren 27rako jarri dute. Egun horretan, Loreak filma aurkeztuko dute, 18:00etan kultur etxean, eta pelikulako protagonistetako bat ekartzen saiatuko dira.
Hurrengo pelikula azaroaren 3an jarriko dute.
Madrilerako autobusean, plazak
Bestalde, azaroaren 7an Madrilgo manifestaziora joateko autobusa antolatu du Harituzek, eta oraindik bost bat plaza geratzen direla azaldu dute. Izena emateko, deitu: 630 678 474. Autobusa hilaren 7an, goizaldean aterako da, eta hurrengo egunaren bukaeran bueltatu. Gastuak eta ostatua norberak ordaindu beharko ditu.