Batzarra deitu dute asteazken honetan, Lezon, Donostialdea-Bidasoa Beheko Zatikako Lurralde Planak eragindako herrietako taldeek. Arratsaldeko 19:00etan izango da, Lezoko Txerrimuñon, eta helburua da, «planaren inguruan informazioa trukatu eta elkarren artean erantzun bateratu bat bultzatzea».
Izan ere, planari alegazioak aurkezteko aukera dago azaroaren 15era arte: «herritarren aldetik oposizio garrantzitsua piztu duten hainbat egitasmo jasotzen ditu: Zubietako errauskailua, AHT...». Adierazi dute, «lurralde okupazio bortitza dakarten poligono logistiko erraldoiak, ekipamendu haundiak, azpiegiturak eta eraldakuntza urbanistiko latzak ahalbidetzen dituzten planak» ezarri nahi dituela Urumea bailaran ere.
Planarekin ados ez dauden guztiei, bertaratzeko deia
Horregatik, «premiazkoa» jo dute, planarekin ados ez dauden talde eta pertsonak elkartzea, eta deia luzatu diete guztiei, bertaratzeko.