Merkataritza eta Inbertsioen Itun Transatlantikoa da TTIP, eta horren bueltan, sentsibilizazio jardunaldiak antolatu dituzte datozen egunotan Biterin, Hernaniko Udalak eta Kooperazio Taldeak.
Hiru saio izango dira, bihartik ostegunera 19:00etan, eta helburua da «akordioaren ondorioez informazioa jasotzea, hausnartzea, eta egoera horri alternatibak bilatzea eta martxan jartzea», azaldu dutenez. Izan ere, TTIParen ondorioa, «gizarte osoaren pribatizazioa» dela azpimarratu dute: «akordio horren ondorioz, guztion eskubideak daude arriskuan, nazioarteko hitzarmen honen helburua ez baita pertsonon bizitza hobetzea, baizik eta gobernuak eta pertsonak ordezkatzen ari diren enpresa haundien etekinak haunditzea».
Júlia Martíren hitzaldia, eta bi mahai inguru
Aurreneko saioan, bihar 19:00etan, hitzaldia emango du Júlia Martí Comas TTIParen kontrako ekintzaileak. Itunari buruzko ezaugarri nagusiak emango ditu aditzera: Zer da TTIPa? Nola eragingo digu? Marko globala.
Hurrengo bi saioetan, berriz, mahai ingurua antolatu dute. Asteazkenean, ikuspuntu desberdinak emango dituzte TTIParen inguruan, eta ostegunean, Euskal Herrian TTIPari aurre egiteko alternatibak jorratuko dituzte hizlariek.