Memoriaren Eguna da azaroaren 10a, eta «Astigarraga Memoriaren Egunera atxikitzen den lehendabiziko urtea izango da aurtengoa», Udalak jakinarazi duenez. «Udal gobernuaren ekimena aho batez onartu zen urriaren 6an egin zen Gizarte Zerbitzuak, Giza Eskubideak eta Enplegu batzorde informatiboan». Hori horrela, azaldu du: «udal gobernu honek, azaroaren 10a biktima guztien oroimenerako eguna izatea nahi du. Egun horretan, eta errespetu osoz biktima guztiei egiten diegun omenaldi gisa, Astigarragako bandera masta erdian egongo da».
Astigarragan, lau biktima
Irailaren 4an Bilbon izan zen Jesus Mari Santos Astigarragako alkatea, Iñigo Urkullu lehendakariak eta Jonan Fernandez, Bakegintzarako eta Bizikidetzarako idazkariak deituta, EAEko beste 127 udalerritako alkaterekin. Azken 50 urteetan herri horietan izan diren eraildako biktimak zein diren jasotzen duen dokumentua eman zieten: Jaurlaritzak landutako Euskal kasuan izandako bizitzeko eskubidearen aurkako urraketen argazkiak, herriz herri (1960-2015) txostena, hain zuzen. Astigarragako lau biktima jasotzen dira bertan: 1978an poliziak su-armaz hildako Joseba Barandiaran Urkola; 1979an GAE eta BVEek tirokatu zuten Tomas Alba Irazusta; 1984an GALek tiroz hildako Bixente Perurena Telletxea; eta 1985ean GALek su-armaz hildako Agustin Irazustabarrena Urruzola.