JOAN den asteko garaipena eta gero, hurrengo partiduan du Hernanik burua. Asteburu lasaia dute oraingoa, eta atsedenaldi hori aprobetxatuko dute, Santanderreko Bathco rugbiren kontrako partidua prestatzeko. Partiduko lekua, fetxa eta ordua zehaztu dituzte: Santanderren jokatuko da, datorren igandean, eguerdiko 12:00etan. CD Hernanik jakinarazi duenez, Santanderrera joateko autobusa antolatu dute. Atsegindegitik aterako da goizeko 09:00etan, eta izena emateko epea zabalik dago. Zintzarrin dago zerrenda, eta 15 euro ordaindu behar dira; autobusa eta partiduko sarrera barne daude, prezioan.
Lau taldek partidua, gaur
Talde nagusiak bezala, Hernaniko beste hainbat taldek ere, deskantsua dute asteburu honetan. Zehazki, jardunaldia izango dute lauk.
Senior gizonezkoek Atletiko San Sebastianen kontra neurtuko dituzte indarrak; Bera Beran jokatuko dute partidua, gaur, arratsaldeko 16:00etan.
Kadete mailan, sub 18an aritzen den taldeak jokoan izango du Euskadiko Txapelketako bigarren jardunaldia. Escor Gaztedi taldearen kontra jokatuko du, Lakuan, 13:45etan
Infantil mailako taldeak ere, Euskadiko Txapelketako bigarren jardunaldia jokatuko du gaur. Escor Gaztedi taldea izango du arerio, 12:30etan.
Azkenik, Azerizaharrek, Semoha taldearen kontra jokatuko dute, 17:00etan Landaren.
Lau jokalari, S19rako deituak
Bestalde, Hernaniko lau jokalari deitu dituzte 19 urtez azpiko selekzioarekin kontzentratzeko: Adrien Capdeville, Jon Ander Puertas, Anartz Elosegi eta Aitor Lukas.