Martxan da berriro, gaurtik, Biteriko zine denboraldia. Eta hasiera emango diona, Heriotzaren triangelua dokumentala izango da, gaueko 22:30etan. Aurreneko saioa izango da, zazpi emanaldiko asteburuan: bost aukera izango dira Heriotzaren triangelua ikusteko, eta beste bi Asterix eta Obelix, jainkoen egoitza ikusteko.
Beraz, bi pelikula jarriko dituzte astebururo, sasoi honetan ere: helduentzako bat, ostiraletik astelehenera; eta gaztetxoentxako beste bat, larunbatean eta igandean. Astelehenean izango da ikuslearen eguna.
«Bi aldiz hil zituztenak memorian esnarazteko» dokumentala
Franco hil ondorengo urte istilutsuetan kokatzen da Heriotzaren triangelua dokumentala. Bertan ematen dute aditzera, Imanol Laburu eta Jose Maria Salinas zuzendariek, nola egin zuten langile, ikasle eta ezkerreko mugimenduen kontra, eskuin muturreko hainbat taldek; mehatxu, jipoi eta hilketen bitartez.
Horrela, dokumentalaren helburua da, «biktima haiek gure memorian esnaraztea, bi aldiz hil baitzituzten; lehena armen bidez, eta bigarrena ahanzturaren bitartez».
Euskeraz emango dute gaur 22:30etan, eta bihar eta igandean 19:30etan; gaztelaniaz, bihar 22:30etan eta astelehenean 16:30etan. Sarrera 4 euro dira; ikuslearen egunean 2,5 euro.
Bertan izango dira zuzendariak, dokumentala aurkezten.