Urtero antolatzen du Bizilagunak ekimena, Amher Sos Arrazakeria elkarteak. Bertako familia bat eta atzerriko bat harremanetan jarri, eta bietako baten etxean elkartzen dira egun horretan, bazkaltzeko. Aurten, azaroaren 22an egingo dute, eta ekimenarekin bat egiteko, proposamen bat prestatu du Sutu Hernanik, herriko gazteentzat.
Horren berri emateko, bilera deitu dute gaur, arratsaldeko 19:00etan, Kontrakantxa gaztetxean. Parte hartu nahi duten guztiek, bertara azaldu beharko dute, eta denen artean antolatuko dute eguna. Gazte guztiei luzatu diete deia, animatu eta prestaketan parte hartzeko.
Lehengo urtean, gazte asko
Ekimenaren azkeneko edizioan, joan den urtean, 66 familia elkartu ziren, eta 27 bazkari egin zituzten. Antolatzaileek nabarmendu zuten, inoiz baino gazte gehiago animatu zirela, zitan parte hartzera.
Euskal Dantza tailerra, bihar
Bestalde, urriko egitarauarekin jarraitzen du Sutu Hernanik egunotan. Bihar, Euskal Dantza tailerra egingo dute, arratsaldeko 16:00etan, Ttarlako lokalean.
Eta datorren astean, bi zita gehiago dauzkate prest: tribialean ariko dira asteartean (18:00); eta Hotel Budapest pelikula ikusiko dute igandean (19:00); gaztetxean biak ere.