Burgosen trenean zijoala, atxilotu egin zuten Hassanna Aalia errefuxiatu sahararra, Polizia Nazionaleko bi agentek, paisanoz jantzita. Espainian modu ilegalean egotea leporatu diote, eta hamabost eguneko epean estatua uzteko agindua eman diote.
Auzitegi Nazionalean jarri duen helegitea erakutsi zien Aaliak agentei, baina aurrekoetan ez bezala, komisariara eraman zuten, eta bi orduz eduki zuten.
Aginduaren kontra, helegitea aurkeztuko du gaur
Kaleratze aginduaren kontra, 48 orduko epea dauka Aaliak, gaur arte, hain justu. Atzo bildu zen abokatuarekin, eta haren arabera, aginduaren gainetik dago Auzitegi Nazionalak martxoan emandako ebazpena, kanporatzeko agindua bertan behera uzten duena.
Aurreratu duenez, aginduaren kontra helegitea aurkeztuko du sahararrak.
Bizi osorako kartzela zigorra ezarri zion Marokok 2011n, Gdeim Izik kanpamenduan parte hartzeagatik. Espainiak asilo politikoa ukatu zion urtarrilean, eta errekurtsoa aurkeztu zuen Auzitegi Nazionalean. Ebazpena eman bitartean, bertan behera utzi zuen auzitegiak, kaleratze agindua.