Azkenaldian, kartoizko zenbait kaxa agertu dira etxeetako atarietan, Hernaniko Udalak jakinarazi duenez. Arropa eta aparatu elektroniko txikiak biltzeko dira kaxa horiek, baina Udalak argi utzi nahi du, zerikusirik ez daukala bilketa horrekin: «guk dakigula, espainiar armadarekin lotura duen AFRES elkartea da bilketa horretaz arduratzen dena; besteak beste, militar eta erreserbistek osatutako elkarte berezia».
Hori horrela dela ikusteko, herritarrei proposatu diete internetera jotzeko: «informazioa nahi izanez gero, webgunea ere badauka elkarteak, eta hara jo baino ez duzue, dioguna baieztatzeko. Berriro diogu, argi eta garbi gera dadin: Udalak ez du zerikusirik delako bilketa horrekin», nabarmendu dute.
«Armadarekin lotura duen AFRES elkartea da bilketa horretaz arduratzen dena», jakinarazi du Udalak.
Udalak bilketa egiteko, beste bide batzuk
Hori dela eta, gogorarazi nahi izan du, Udalak beste bide batzuk erabiltzen dituela, arropa eta aparatu elektroniko txikien bilketa egiteko: «arropa uzteko, bide publikoan Old Berriko edukiontziak daude: Agustindarren plazan, Udaltzaingoaren aurrean eta Elkano 1en parean, udaletxe aurrean».
Aparatu elektronikoak jasotzeko, berriz, garbiguneak jarri dituzte: «Udalak lau garbigune txiki jarri ditu, bide publikoan: Sagastialden (haur eskolaren aurrean), Ertzain etxeko errotondaren parean, Urbieta kalean (esne makinaren ondoan) eta Agustindarren plazan (Old Berriren edukiontziaren ondoan)». Puntu horiek dira, Udalak bilketarako jarri dituen bakarrak.