Jokoan hasi zuten ospakizun astea atzo, Goiz Eguzki egoitzan, eta hitzaldi batekin emango diote segida gaur, datozen egunetako festari bidea egiteko. 43garren urteurrena ari dira ospatzen, eta aste osoko plana egin dute.
Gaurko zita, arratsaldeko 17:00etan jarri dute: asertibitateaz ariko dira, autoestima sano baten erakusle dela aditzera emateko.
Kaleko jokuak, bihar eta ostiralean ere bai
Atzo aritu ziren kaleko jokuetan, tokan, botean, igelan eta dardoetan. Eta beste bi saio ere izango dituzte astean zehar. Bihar izango da bigarrena, eta ostiralean azkenekoa, bakoitzaren abileziak agerian uzteko.
Zinea, ostegunean
Zineaz ere gozatuko dute, ostegun arratsaldean, 17:00etan. Eta beste bi zita ere jarri dituzte asteburuan: larunbatean, Goiz Eguzki abesbatzak kantatuko du, 19:00etan; eta igandean, bazkaria egingo dute 14:00etan. Opariak ere zozketatuko dituzte, eta jokuen sariak. Eta nola ez, dantzan bukatuko dute festa!