Bitik bi irabazi ditu Hernanik, Landaren; eta hori bakarrik ez, bi partiduak bonusarekin borobildu ditu. Atzo Bartzelonaren kontra neurtu zituen indarrak, eta irabazi beharreko partiduari gogor eutsi zion; 26-20 nagusitu zen Hernani, eta bosgarren da sailkapen orokorrean.
Hirugarren jardunaldia izan arren, aurreneko minututik nabaritu zen asko zegoela jokoan. Bartzelona eta Hernani aurkari zuzenak izan ziren joan den urtean, eta puntu hauek poltsikoratzea oso garrantzitsua zen bientzat. Erritmo altuan jokatu zen aurreneko zatia, eta Hernanik 19garren minutuan ireki zuen markagailua, Iñaki Otxotorenaren entsaioarekin. Lau minutura, aldea haunditu zuen Oier Garmendiaren entsaioarekin, eta Pello Perezen gauzaketarekin; 12-0 zen Hernani aurretik. Trikoloreek lanean jarraitu zuten aldea haunditzeko, eta Iñaki Otxotorenak bigarren entsaioa egin zuen 33garren minutuan; Perezen gauzaketarekin, 19-0 ari ziren irabazten. Bartzelonak ez zuen amore eman, eta atsedenaldiaren aurretik aldea murriztu zuen Bruno Granellen entsaioarekin eta Hugo Pezet-Pouxen gauzaketarekin. Atsedenaldian, 19-7.
Indartsu hasi zuen bigarren zatia Bartzelonak eta bost minutura entsaioa egin zuen Ivan Gurrierek. Hernanik aldea haunditu zuen, Otxotorenaren hirugarren entsaioarekin eta Pello Perezen gauzaketarekin; eta bonusa lortu zuen. Bartzelonak ez zuen amore eman, eta Hernaniren nekealdia aprobetxatu zuen; Adria Torten zigor kolpearekin eta Mauro Pintoren entsaioarekin, 26-20era gerturatu ziren. Bukaera estua izan bazen ere, trikoloreentzat izan zen garaipena.