Kaxko bizilagun elkarteak antzerki talde bat gonbidatu du gaur Hernanira; Ezezagunok taldeak La verdadera historia de Romeo y Julieta obra antzeztuko du, iluntzeko 20:00etan hasita, Biteri kultur etxean. Obra dibertigarria, eta aldi berean, konprometitua dela azaldu dute antzerki taldeko kideek.
Maitasuna, pasioa eta tragediaz harago
Ezezagunok taldeak interpretatuko duen obra Romeo y Julieta obraren egokitzapen berezi bat izango da. Obra hori maitasuna, pasioa eta tragediarekin lotzen bada ere, bestelako gaiak azaleratuko dituzte gaurkoan.
Julietaren aita nazkatuta dago alaba etxean edukitzeaz, eta opari berezi bat egingo dio. Apaiza, berriz, nekatuta dago elkarren kontra dauden familien artean bakea jartzeaz eta Wiliamen amaiera tristeko ipuinekin. Romeo, berriz, maiteminduta eta pozik dago. Guztia nahastuta, istorio korapilatsu eta dibertigarria sortuko da. Eta horrez gain, antzerki talde honek mezu jakin bat emango du, ezintasunen bat dutenen arteko erlazioen inguruan.
Gazteen Antzerki Topaketan, saria
Ezezagunok taldea adimen urritasunen bat duten pertsonek osatzen dute, eta Donostiako Gazteen Antzerki Topaketan saria jaso zuen.