Hernaniko Alboka Topaketak 22garren edizioa du aurtengoa. Atzo hasi zen, Albokatropik taldearen emanaldiarekin.
Alboka ez ezik, trikitixa, tronpeta, xirula, gitarra edota panderoa ere jo zituen Iparraldeko hirukote honek, eta musika garaikidea erritmo tradizionalekin nahastuta, kontzertu dibertigarri eta alaia eman zuten.
Gaurkoa, berriz, festa egun haundia izango da, Euskal Herriko txoko guztietako alboka jotzaileak elkartuko baitira Hernanin
Emanaldiak eta azoka, eguerdi partean
Goizeko 11:30etan jarri dute zita, Plazan, Araba, Bizkaia, Iparraldea, Nafarroa eta Gipuzkoatik etorriko diren alboka jotzaileek. Eguerdiko 12:00ak aldera kalejiran aterako dira kaxkoan barrena, eta eguerdiko 13:00ean Albokaldia emango dute Tilosetan (eguraldiak txarrera eginez gero, Atsegindegin).
Albokaldian, emanaldi txikiak joko dituzten alboka joleek, bikoteka edo taldeka. Horrez gain, azoka jarriko dute, alboka egileen piezekin eta soinu tresna honekin lotutako hainbat gairekin.
Bazkaria eta festa, eguna bukatzeko
Goizean zehar gastatuko indarrak berreskuratzeko, bazkaria egingo dute denek elkarrekin Santa Barbara elkartean, 14:30ak aldean.
Bapo eginda, arratsaldeko 18:00ak aldean kaleak alaitzera aterako dira berriro alboka jole guztiak, Alboka Topaketako festari, datorren urtera arte behintzat, agur esateko.