Izarrei begira egonen dira gaur aranoarrak, Suron, Ixerkeiko zabalean. Herrigintza Eskolen barruan, saio berri bat izanen da, Aranzadiko astronomoek gidatuta. Iaz egin zuten aurrenekoz, eta izan zuen erantzun ona ikusita, errepikatzea erabaki dute: lagun asko bertaratu ziren, astronomoen azalpenak entzun eta konstelazio eta planetak ikustera.
Gaur gaueko 21:00etan jarri dute zita, eta proposatu dute, bakoitzak bere bokadiloa eramatea, bertan afaltzeko, saioaz gozatu bitartean. Gaueko 23:30ak arte egonen dira, begiak zeruan dituztela.
Eguraldiarekin, kezka
Azken egunotan, eguraldiarekin kezkatuta egon dira Herrigintza Eskolaren antolatzaileak eta Aranzadiko astronomoak. Izan ere, zerua estalita egon da, eta izarguneak ikusteko zailtasunak izan zitezkeen. Hala ere, saioarekin aurrera egitea erabaki dute, eguraldiak lagundu eta izarguneak ikusteko aukera emanen duen esperantzan.
Azaldu dutenez, «Ixerkeiko zabala gustoko izan dute beti, izarrak ikustea maite dutenek». Asko bertaratzen ziren teleskopio eta guzti, eta horren berri izan zutenean, saio bat antolatzea pentsatu zuten.
«Ordu batzuetan, leku honen xarma berreskuratzea izanen da Herrigintza Eskolaren asmoa», aurreratu dute.