Biharko partiduaren aitzakian, eta Hernani Errugbi Elkartearen 50garren urteurrenari «azken txupinazoa» emateko, festa haundia prestatu dute asteburu honetan, talde hirukoloreak eta Bartzelonak. Topaketa-torneoa jokatuko dute gaur arratsaldean, eta adin guztietako taldeak ariko dira lehian. Horrela, antzeko filosofia duten bi taldek, harrobia asko lantzen dutenak, kategoria guztietan neurtuko dituzte indarrak.
10 urtez azpikoak izango dira zelairatzen aurrenak, arratsaldeko 16:00etan, Landareko bigarren zelaian. Aurrenekoan, 16 urtez azpikoek jokatuko dute, 16:30etan hasita. Eta sub12koek, 17:00etan ekingo diote, bigarren zelaian haiek ere. Arratsaldeko 18:00etan, berriz, bi zelaietan izango da lehia: 18 urtez azpikoak batean, eta 14 urtez azpikoak bestean. Beteranoek ere ezin zuten huts egin, eta haiek borobilduko dute arratsaldeko festa, 19:00etatik aurrera.
Afaria eta lotarako tokia, hirukoloreen kontu
Festa ez da zelaian bukatuko, hala ere. Partiduen ondoren, afaria ere egingo dute Landaren bertan, adin guztietako jokalariek. Eta lotarakoan, aspaldiko ohitura bat berreskuratuko dute: Hernaniko jokalari bakoitzak, Bartzelonako bat eraman beharko du etxera; kasu batzuetan, bi ere bai, jokalari askorekin etorriko baita talde kataluniarra.
«Aspaldi ez genuen formula hau erabiltzen, eta pena da, jokalarien arteko harremana izugarri sendotzen baitu. Orokorrean, oso harreman aberatsa sortzen da beraien artean», azaldu dute Hernani Errugbi Elkartetik.
Ohorezko Mailako partidua ikusten, bihar
Bihar jarriko diote errematea topaketari, Ohorezko Mailako partiduarekin. Eguerdiko 12:00etan jokatuko dute Hernanik eta Bartzelonak, eta bertan izango dira adin guztietako jokalariak ere, partidua girotzen.
Igor Genua faltako da bihar, Kenian ariko baita asteburuan, 7ko Espainiako selekzioarekin, Nairobi Safari Sevensean.